1Cor 6 | AOJFILIFITA | STEP | IꞋi enin epen laꞋafena ipeꞋ nendaꞋ basef mila enin epen, ina andeandeꞋma epen inima netopaꞋma esis amam nematawa Godi sope ma nefeꞋ nendaꞋ kota naep amam dembemi jas mololama Godi. NaꞋama owaꞋ. AndeandeꞋma epen inima ambal aona nefeꞋ nendaꞋ kota naep amam jas mololama Godi.

1 Corinthians 6

Kristen ina sondaꞋ kotima sahin owan, owaꞋ

1 IꞋi enin epen laꞋafena ipeꞋ nendaꞋ basef mila enin epen, ina andeandeꞋma epen inima netopaꞋma esis amam nematawa Godi sope ma nefeꞋ nendaꞋ kota naep amam dembemi jas mololama Godi. NaꞋama owaꞋ. AndeandeꞋma epen inima ambal aona nefeꞋ nendaꞋ kota naep amam jas mololama Godi. 2 ApeꞋ amam nematawa Godi anona nemaf mowaloga waf epes hiesi etapasi hiꞋilas. IpeꞋ pegawa amama o owaꞋ? AꞋi ipeꞋ owaꞋ laꞋifipama ataꞋ pewaloga basef soꞋumi mamumami ipeꞋimi? 3 ApeꞋ anona nemaf mowaloga waf amam enseli wapotiꞋ. IpeꞋ pegawa amama o owaꞋ? Amama atom deiꞋ laꞋifipa endilisi ma pewaloga basef amamaga ipeꞋimi. 4 EaꞋ iꞋi ipeꞋ anom basefa amamaga ipeꞋimi, ipeꞋ pendandepa anom amam agof aꞋami ma sios ma mowaloga basef amama. 5 AeꞋ andaꞋ basef amama ma mondaꞋ ambagof ipeꞋimi aom. DeiꞋ main? Gawaimi ipeꞋimi hiami mape laꞋafena ipeꞋ amam laꞋifima mowaloga anom basef motaga laꞋafena sahin owan bias ipeꞋisi. 6 EaꞋ deiꞋ enin epen alipini nandaꞋ kotima sahin owan ananini ma naep amam dembemi jas owaꞋ mombaleꞋefa Kraisi.

7 IpeꞋ pandaꞋ kotima esis alupisi eaꞋ amama atom deiꞋ sihiꞋamba aeꞋ ipeꞋ pewa eaꞋ. DeiꞋ maina owaꞋ pepe pitilisa sondaꞋmepa waf aonai? EaꞋ owaꞋ piꞋi ahoꞋmas sofaꞋ anom amamaga ipeꞋimi? 8 PendaꞋam naꞋama owaꞋ. EaꞋ ipeꞋ pandaꞋ waf aonaima enis epes pefaꞋ amamaga asasimi! IpeꞋ pandaꞋ waf naꞋamai ma esis alupusi endilisi ipeꞋisi etis.

9 Emi egafis sandaꞋ waf aonai, anona nemaf ina sefeꞋ wambel Godi, owaꞋ. IpeꞋ pegawa amama o owaꞋ? NaꞋama ipeꞋ pembasoꞋma ukup ipeꞋimi atom. Epes sandaꞋ waf aonai ma soꞋa waola enis amam nematawa saloma epes isima sandaꞋ lotuma god basoꞋomunai saloma epes sahambombaga waf dasoꞋamainai saloma amam amama ukup maꞋi waf nematawainai saloma amam amama mandaꞋ waf aonai maloma anom amami 10 saloma isima sandaꞋ wali saloma epes kowalasa amamaga enis epesi saꞋi sofaꞋam etini saloma epes isima saꞋ embel sahaga sagaol saloma epes isima saꞋi basef awami findiwaimi ma enis epes eaꞋ isima sandaꞋ wal sahambombaga epesi, epes isima naꞋamaisi ina anona nemaf sefeꞋ wambel Godi, owaꞋetin. 11 FowaꞋ enipa pandaꞋ waf anama. EaꞋ deiꞋ God nasaꞋopepa nosaheꞋepa eaꞋ Ananipei etipa siꞋipa. God nandaꞋepa pataga epes buꞋupei ma naep Ananimi. Anan nandaꞋepa naꞋama etina agel Dembinai Jisas Kraisi ma Ambal BuꞋunai God apeꞋinai.

Alop apeꞋinai nope boꞋona ma mefela agel Godi

12 Endilisi, anom basef mape maꞋi, “Amamaga hiami andeandeꞋma aeꞋ endaꞋam.”

EaꞋ amamaga amama nambimb endaꞋami ina migiambame, owaꞋ. Basef amama maꞋi, “Amamaga hiami andeandeꞋma endaꞋam.”

Basef amama mape, eaꞋ aeꞋ ina iꞋi ahoꞋma anom amamaga mope luꞋum mombaleꞋe, owaꞋ. 13 EaꞋ enis epes saꞋi, “GwaꞋaimi amama, alopi atom eaꞋ alop napoma neaꞋ gwaꞋaimi atom.”

EaꞋ amamaga amama biefim, alop naloma gwaꞋaimi, anona nemaf God nohambombagam atom hiꞋilam. God ina nandaꞋ alop apeꞋinai ma nondaꞋ waf aonai soꞋa waolanai, owaꞋ. Anan nandaꞋana nondaꞋ maol Ananinai atona buꞋunai. EaꞋ Anan Dembinai ma alop apeꞋinai numafiana. 14 Ama pepel Ananinai atona nafela Dembinai nohafel hiꞋagif eaꞋ anona nemaf naꞋama etina nofelapa mohafel hiꞋagif wapotiꞋ. 15 Alop ipeꞋinai alop waꞋwaꞋana Kraisi atona. Amama ipeꞋ pegawam o owaꞋ? EaꞋ deiꞋ ipeꞋ paꞋi aeꞋ etopaꞋ anona alop waꞋawaꞋana Kraisi esana noloma alop anoꞋw nemataꞋw kwandaꞋ soꞋa wauli? OwaꞋetin! 16 Amam emi egafim mofaꞋ alop amamunai mosana noloma alop anoꞋw nemataꞋw kwandaꞋ soꞋa wauli, amam mataga alop etifina maloma akwaꞋw. IpeꞋ pegawa amama o owaꞋ? DeiꞋ main, Baibel naꞋiam eaꞋ waf anama dasoꞋamainai buꞋunai naꞋi, “Esis bias sataga alop etifina ma waf anama.”

17 EaꞋ emi egafis sope laꞋifis soloma Dembinai, sataga ukup etifim salomana, siꞋi epen atotona.

18 IpeꞋ pekwaha waf aonai soꞋa waolanai pefaꞋ pefeꞋ. Anona waf hianai aonai sandaꞋana alop andeꞋ atogon. EaꞋ epen nandaꞋ waf aonai soꞋa waolanai nandaꞋ waf aonai ma alop ananinai atona. 19 Alop ipeꞋinai ipat buꞋunai Ambal BuꞋunai Godi. IpeꞋ pegawa amama a owa? Ambal anama nosaheꞋepa eaꞋ nape nomona ipeꞋ. IpeꞋ ina ipeꞋ etipa, owaꞋ. IpeꞋ ananipei etipa siꞋipa. 20 God natalepa ma maol luꞋunai endilisi. Amama atom deiꞋ pefela agel ananinai luꞋuna ma alop ipeꞋinai.